يا ذا الغياب اللي عليها حيل طال
ترقب حضوره بين شمسه والامل
بحة بكاها تعزف الفرقى شمال
يم الديار اللي لها عاشق رحل
هذه صحاري عزها عشق وامال
جرت غرامه في رماله ماتزل
في صمتها في دمعها جرح وسوال
في عينها شوق وبقايا من زعل
شيخه وفا شيخه صبر شيخه دلال
متسلطنة في عشقها منذ الازل
يانادرة يالولوه وسط الرمال
ابشوفها دمع الغياب المر هل
احكي لعشاق الهجر كيف الوصال
اعطي دروسك في بدايات الغزل
واحمي يتامى الحب من جور الليال
نادي قيادات اللقاء تحضر عجل
تعلن ختام العشق في اعظم مثال
يومن حضنيته و نسيتي وش حصل
وانك غفرتي ذنب غايب لو محال
حبك اصيل ونهجه اليوم اكتمل