المشرف العام 

الشاعرة شموخ المالكي

تلملمني كفوفك حُب ..تنثرني وجع وجراح ؟
وش يحدك على القلب الجريح اتبيح مكنونه

انا اظنك سفينة وصل تاهت في مهب ارياح
مثل وجه الجنون اللي تبسم لجل مجنونه

حبيب الماضي الغافي بعتمه خانها المصباح
تشوف الحزن ماخلا زهر تفرح به اغصونه؟

صرم غصن العروق اللي حضن تغريدة الأرواح
حطبها ياس وجروح وندم واوهام ملعونه

الا يازيزفون الوصل حلمك ريح عطره فاح
نسيم اطيوفك الخرسا رسايل عشق مفتونه

عديل الروح لا تهجر شعوري والزوايا اشباح
وانا الصوت الجميل اللي هتف لك باعذب الحونه

اخذني حلم يتبلور ولايكسر لو انه طاح
تعال افرد شراعك للغلا واستوطن امتونه

اخذني من حدود التيه رجع كل شيٍ راح
دخيلك شوف روحي في رفوف الكبت مركونه

ابيك اتصير لي منفى.. وطن .. مكسب ..وابيك ارباح
ابيك المغرم اللي مايمل الطيش وجنونه

ابيك ..احساس وشعور وشعر وروايةٍ تجتاح
فؤاد اللي تركها الوقت للتحنان وشجونه

واكون الجفن لعيونك لامن دمع المواجع ساح
واشيد لك بقلبي قصر ماتتزلزل ركونه

هذا عهدي وذا قلبي وبيدك تملك المفتاح
ياتملكني غلا والا اقعد المنفاي مرهونه